Telekomunikasaun Indonesia International (TL), S.A. (Telkomcel) iha loron 17 September tinan 2021 kompleta ona tinan sia hala’o servisu telekomunikasaun iha Timor-Leste. Selebra aniversariu ba dala-9 ida ne’e, Telkomcel liu husi servisu Corporate Social Responsibility (CSR) Program hala’o asaun karidade nebe’e konhesidu ho naran “TelkomcelCare” sei oferese kareta ambulansia unidade ida ba Ministerio Saude Timor- Leste. Seremonia entrega kareta ambulansia hala’o iha 13 setembru 2021 iha edifisiu Ministerio Saude Timor-Leste no sei entrega direitamente husi Chief Executive Officer (CEO) Telkomcel, Yogi Rizkian Bahar no sei simu direitamentet husi Ministra Saude (MS) Timor-Leste, Odete Maria Freitas Belo, iha knar fatin, Palacio da Sinzas, Caicoli, Dili, Timor-Leste.

Fasilidade kareta ambulansia unidade ida ne’e tuir standar international ho rekejitu espesifiku husi Ministerio da Saude Timor-Leste, espera fasilidade ida ne’e bele ajuda no supporta diak liu tan prosesu atendementu ba pasiente covid-19 ho nia tipu no variante foun nebe’e maka sai hanesan perkupasaun global.

Telkomcel hanesan parseiru dezenvolvimentu ba nasaun RDTL, sei iha komitmentu nafatin apoiu Governu Timor-Leste liu husi Ministerio Saude Timor-Leste atu nune’e bele ajuda no supporta diak liu tan servisu Ministerio Saude hodi aselera prosesu atendementu ba pasiente moras covid-19 nebe’e maka agora dadaun nia numeru pasiente sae makas iha Timor-Leste. Ami espera katak ajuda husi ami hotu familia boot Telkomcel ida ne’e bele apoiu no ajuda aselera movimentu pasiente moras covid-19 ba hospital ho lais.